再過多大半日, 新嘅一年又嚟嘞!!
希望以後唔駛再拍埋啲 "廢柴聯盟" 嘅成員!!
希望自己唔會被標籤為 "廢柴聯盟" 嘅成員!!
希望同事們身體健康!!
希望以後冇咁多cases做!!
希望上級們以後响我份週年評核報告度at least畀個 "B" 我!!
希望全球經濟好轉, 香港冇咁多刁民!!
希望..........
我係咪諗多咗?! 好似諗得太遠?!
Happy New Year!! 2009年再見!!
年尾, 係頒發成績表嘅時候..........
其實好唔明點解啲上級咁鬼孤寒?! 唔通畀下屬 "B" or above嘅grading係有quota嘅?!
咁以後開工係咪即係唔駛咁賣力先?! 橫掂就算全年幾咁努力, 做嘢幾咁outstanding, 到咗年底都係得個 "C" 咯!!
定還是個個做嘢都 "吔吔嗚" 咁唔掂, 真係值個 "C" 吖?! 甚至乎畀 "C" 都over咗?!
莫非上級係用心良苦, 想留返個空間畀我哋去進步?!
唉..........
今年託賴有個 "短期要職" 頂一頂, 我嘅週年評核報告攞咗個 "B"..........
今年寫我嗰位上級係睇住我入行架~~記得當年我training完出嚟頭半個月係跟佢understudy嘅, 當時佢都未升職, 一嚿飯嘅我仲激到佢好忟添!! 不過佢冇耐就調咗去第二度守lu (但唔關我事嗰喎!!), 所以我哋真真正正一齊合作嘅時間唔係好多!!
今年終於再有機會合作, 佢仲名正言順咁supervise我添!! 今日好慶幸佢認同我嘅工作表現, 仲語重心長咁講咗好多鼓勵嘅說話!! 不過因為我搏緊, 佢同我講嘅嘢我左耳入右耳出咗嘞~~我搏緊乜?! 搏炒囉~~唔通搏上位咩?! 我始終覺得做個基層員工過癮啲!!
之但係, 其他上級們千祈唔好求其畀個 "C" 我囉~~雖然我老早就max咗, 個annual report又影響唔到我份糧..........其實畀個 "B" 我, 同樣係留咗進步嘅空間啫!! 我唔大貪架!!
我會做好依份工, 去證明我係值個 "B" 嘅!!
今日係Boxing Day, 雖然三醉清安冇禮物收又冇禮物拆, 但講開 "box" 就諗返起有一晚, 一名保安員打嚟999, 個call係我收嘅..........
"警察999"
"我係XX公園嘅保安嚟架; 有人放咗個紙盒响度喎, 唔知裏面有啲乜!!"
"你知唔知邊個放响度架?!"
"唔知呀!!"
"咁你有冇打開嚟睇吓呀?!"
"冇呀, 我唔敢開嚟睇, 我驚呀!!"
"吓~~咁呀, 咁個盒放咗响度幾耐呀?!"
"唔知喎, 都係啲細路話畀我聽我先至知架咋!!"
"咁個盒幾大呀?!"
"約略尺半乘一尺乘一尺啦!!"
"咁個盒上面有冇寫啲乜嘢字句架?! 同埋有冇啲乜嘢特別聲響傳出嚟呀?!"
"咁又冇喎!!"
"先生, 請問你貴姓架?!"
"姓X."
"X先生麻煩你留埋個電話號碼畀我吖."
"XXXXXXXX"
"我哋依家派同事過嚟, 麻煩你响度等警察到啦, 拜拜." (對話完畢)
收完call開case, 總得要安排一個貼切嘅排頭, 之但係開乜好先?! 如果開 "可疑物品發現" 好似會開得大得濟 (因為憑直覺就咁聽都冇乜可疑!!) 但如果開 "財物發現" 又好似好古怪 (話晒個報案人都唔知盒裏面有啲乜!!) 响無計可施之下, 我就開咗最原始嘅排頭~~"求警調查"!!
最後如我所瞭, 經警方調查後, 依單嘢根本就係好簡單嘅 "財物發現" 嚟~~個盒裏面有隻喇叭 (用口吹嘅樂器呀~~小喇叭!!), 而個物主都好快嚟到攞返佢走咯!!
尋日係普天同慶普世歡騰嘅平安夜, 可惜名不副實, 一啲都唔平安..........
冇辦法, 每逢公眾假期 (尤其是長假期), 個個都會走晒出街玩. 今期仲要係耶穌生日咁大個排頭喎, 梗係要玩到癲晒啦, 係咪先?! 唔係點對得佢住吖?!
人多玩得高興就會嘈, 嘈就即係有噪音, 有噪音就會有噪音投訴, 咪又揾著警察嚟搞囉!!
人多做乜好?! 開P啦!! 開P即係有酒飲, 飲酒就會有不勝酒力嘅醉酒人士, 咪又揾著警察嚟搞囉!!
人多就即係口多, 口多就會有意見不合嘅可能, 咁就有交嗌囉!! 郁郁吓口又可能會郁手喎..........唉~~唔揾警察揾邊個搞吖?!
就係咁樣, 尋晚嘅平安夜就响異常忙碌嘅工作中不平安地度過咗嘞..........
我今日好似講得太多耶穌~~其實我只係想發吓嚕囌咁嘅啫!!
Anyway, Merry X'mas to all of U!!
阿門!!
今個月話咁快已經過咗一大半嘞, 但對我嚟講就簡直係度日如年..........
今期坐台拍著一位沙展, 其實佢份人好nice冇乜嘢架, 之不過佢嗰種 "老油條" 嘅工作姿態就認真惡頂:
1) 一開工落完簿斟完水櫈都未坐暖唔理個台嘅死活就走咗去飲茶!!
2) 食飯時間限時一個鐘但佢就食足個半鐘先至捨得返嚟!!
3) 反應緩慢動作遲鈍同僚嗌機慢四拍先至應, check嘢慢慢嚟慢到第二個甚至第三個同僚嗌機又話要check嘢但係第一個都仲仍然响度呆等緊佢嘅result!!
4) 到我應機諗住幫個同僚check嘢佢又同人講話電台繁忙唔check住, 但其實當時只係cases多, 忙又唔係特別好忙, 講真吖我真係好有誠意想幫個同僚check嘢架!! check嘢有幾複雜有幾困難啫?! it's my pleasure!! By the way, 我唔明佢check一樣嘢點解可以check咁耐?!
5) 同僚做完啲cases電話報料固之然全部都係留返晒畀我收料等我入電腦啦, 回晒料入得清清楚楚佢都仲要問我單case可以close未?! 好吖我一定答 "我唔知道!! 我唔話得事!!", 我係唔會亦都唔可以幫佢揸主意嗰喎, 我份人工冇包埋依個工作範疇!!
6) 未完成嘅cases乜料都未入偏偏佢就close咗喎, 搞到我又要麻煩啲上級去開返啲cases!!
7) 响電台都做咗at least兩年啦, 但佢仲係好似唔熟啲工作程序咁!!
8) 佢嘅 "差齡" 甚至可能連 "柴齡" 都大過我嘅年齡, 但啲police knowledges好似仲弱過我!!
9) 冇嘢做嗰陣 (注意: 只係佢冇嘢做嗰陣) 就同我對面條 "廢柴" 大聲傾計, 無論話題跟工作有關與否都完全影響緊我嘅工作!! 乜嘢叫 "聲浪擾人" 我完全明白晒, 難怪年中我响999收到咁多看似無理但其實可能有理嘅噪音投訴!!
10) 冇人同佢講嘢佢就自己自言自語講埋啲無聊/無謂嘢!!
諗返轉頭其實係咪我年紀太細未能做到佢嗰種 "不愠不忟" 呢?! 係咪我配合唔到佢?! 定還是: 係我太性急?! 係我做事太落力太上心?! 係我太有衝勁太有活力?!
其實係咪我錯咗?! 可能最惡頂嗰個係我~~我諗我先至係真真正正嘅 "廢柴"!!
不過諗唔明都唔緊要啦, 橫掂坐多8日都調台咯, 只要我捱到依8日就可以過到年架嘞!!
最大問題係佢個台真係好鬼多嘢做呀, 簡直係攞人命架!!
依個月 "月長" 有31日, 份糧本身已經分薄咗難賺咗架啦, 家陣搣開嚟仲唔係有血有汗有淚?!
