曾經有單 "醉酒人士" 案件~~報案人見到一名少女醉到啤啤呼瞓咗响大街大巷, 而身邊就有兩個相信係唔識嘅男人摷緊佢個手袋!!

警察同救護車到場時, 只係剩返個女仔响度, 佢個人都醒返啲冇乜事嘅, 之但係就唔見咗部手機囉!! 可惜佢又醒唔起部手機係响幾時, 邊度同點樣唔見, 而且又冇目擊證人親眼睇到其他人偷佢嘅, 結果咪報lost當破財囉!!

三醉清安在此勸喻各位: 就算係人哋出酒, 你都咪出命飲到咁醉啦!! 若然醉咗就最好揾個信得過嘅朋友陪同早啲返歸, 醉酒好易累事架!! 破財事小呀..........係咪?!

今日三醉清安要講一個悲劇, 故事主角係一位經已不幸離世嘅婆婆..........

數年前一個落雨嘅晚上, 响某屋邨大廈走廊裏面, 有兩個鄰居因小事嘈交兼且就嚟郁手!! 婆婆見到咁嘅情況, 相嗌唔好口, 於是就一片好心出嚟勸交囉!!

期間, 其中一方拎住把長柄遮並意圖襲擊對方, 點知混亂間意外擊中婆婆..........

婆婆經搶救後最終不治, 就咁冇咗條命; 而依單案件就由原本好普通嘅 "糾紛" 變為 "誤殺"!!

但願婆婆可以安息!!

有啲所謂嘅報案人, 一打嚟999就話畀人打, 跟住就廢噏一堆完全顯示唔到位置嘅舖頭名, 有啲就衰格到淨係掛住同後面嗰個係咁嘈 (but I'm still here, talk to me, please!!), 然後就收線架喇.......... 打返畀佢一係就相同情況, 一係就打唔通, 一係就留言.......... 頂!!!!!!!!!! 畀著係我都想打你呀!!

如果係用固網電話打嚟都仲好啲吖, 就算冇來電顯示地址, 我都仲可以追線揾你個位置, 只係慢啲啫!! 不過好邪嗰喎, 依啲咁討厭嘅情況多數都係用手提電話打嚟嗰喎!! 真係打死冇命賠, 事關唔知你响邊, 冇得做!!

真係有心報警嘅就唔該專心啲報完先啦!! 咪鬼我有我問, 你有你講先得架!! 你唔合作嘅, 我想幫都無能為力啦, 係咪?! 要人救你, 都先要自救!!

就好似今日咁, 有位女士用手提電話打嚟話畀人打, 佢答非所問, 係咁講一堆舖頭名出嚟就收線嘞!! 大姑, 首先我個電話唔係3G, 冇視像睇唔到你响邊!! 仲有, 你講嗰啲舖頭全部都唔出名架, 真係唔知响邊呀!!

冇辦法, 唯有打返佢個來電顯示嘞!! 接聽嘅係個男人, 佢話嗰個係佢老婆嚟嘅, 佢仲堅稱冇事添 (但明明個女人仲响後面呱呱嘈囉!!), 問多佢兩句就開始發難渣, 話自己都畀人打喎, 但死都唔肯講清楚個位置囉, 跟住收埋線唔再聽電話添!! 賤格!!

哼~~天網恢恢!! 有其他人見到佢哋糾纏喎, 幫佢哋報埋警, 位置仲講得好清晰添!! 最後兩個都拉咗~~"Fighting in a Public Place" (公眾地方打鬥), 因為雙方都有郁手!!

記得當年三醉清安仲係新仔, 初初埋位坐999嗰陣, 對香港啲地方名孤陋寡聞, 簡直係井底蛙!!

有次, 有位報案人報佢嘅位置係 "對面海", 我誤以為佢報嘅係响 "對面海" 嘅港島, 仲差啲傻仔到駁埋條線過港島總區咁濟添!! 好彩依位報案人及時澄清係西貢區嘅對面海村, 我先至冇出洋相咋!!

哈哈~~好一條 "對面海村"!!

電視劇集, 認真影響深遠!!

原來到咗今時今日, 依然都仲會有人信以為真, 誤以為真係要等足24小時, 甚至48小時, 先至可以報失踪人口..........

錯晒!!

其實只要報案人覺得真係有必要, 都可以隨時報警. 若然情況緊急, 更加可以打999添啦!!

各位要明白, 响24/48小時之內係可以有幾多變數發生先得架, 係咪?! 所以呢, 報失踪人口嘅案件, 真係冇話一定要等足24/48小時依啲咁嘅規矩架!!

詳情可參考以下官方網址:
http://www.police.gov.hk/hkp-home/chinese/missing/mpu.htm