唔覺唔覺依個Low Key Blog已經出咗100篇網誌嘞, 今日依篇係第1000001篇!! Oh sorry, 手震打多咗幾個零添, 係第101篇至真!! 首先多謝各位一直以來嘅支持, 多謝晒, 希望下個100篇你哋都仲會繼續响度睇住小弟啦!!

一直以嚟, 唔係咁多人知道三醉清安嘅真正身分 (而我亦都冇打算公開!!), 我~~只不過係一個人微言薄嘅PCO嚟啫!! 記得大半年前啱啱開依個blog嗰陣, 分別有兩位前輩曾經好心提醒過我, 叫我千祈唔好响個blog度鬧警隊, 當時我回應, 我會小心我嘅言行架嘞!! 講真吖, 我又點會傻到走去揾自己份工嚟較飛先得架?! 就算我真係有幾唔鍾意份工都好, 我都冇理由同份糧, 同啲錢過唔去啫!! 錢~~唔係萬能, 但冇咗佢就萬萬不能, 依個道理我細細個嗰陣就已經清楚明白架嘞!! 所以懇請各位, 千祈咪期待會响依個blog度見到警隊大揭秘, 知道冇?!

近來, 我的而且確係懶咗寫blog, 由以前每個禮拜at least三篇, 寫到依家一個月先至寫得一兩篇. 其實我並唔係欠缺題材, 反而仲有好多嘢想寫添, 只不過唔知由邊度寫起啫!! 況且依個blog又唔係話有多人睇, 咁樣我仲一次過寫咁多為乜先?? 以後我就儘管隨心寫啦, 你哋就隨緣睇囉!!

唔~~開始有啲擔心自己寫唔到第二個一百篇添..........