數年前一個落雨嘅晚上, 响某屋邨大廈走廊裏面, 有兩個鄰居因小事嘈交兼且就嚟郁手!! 婆婆見到咁嘅情況, 相嗌唔好口, 於是就一片好心出嚟勸交囉!!

期間, 其中一方拎住把長柄遮並意圖襲擊對方, 點知混亂間意外擊中婆婆..........

婆婆經搶救後最終不治, 就咁冇咗條命; 而依單案件就由原本好普通嘅 "糾紛" 變為 "誤殺"!!

但願婆婆可以安息!!

一名油站姐姐vs單拖持槍賊人..........

"打劫呀!!" (單拖持槍賊人單刀直入)
"咩話?!" (油站姐姐反問)
"打劫呀!!" (賊人攞出疑似手槍物體指嚇油站姐姐)
"哎吔, 你唔好玩啦!!" (油站姐姐一手推開疑似手槍物體)
"真係打劫呀!!" (賊人有啲唔耐煩)
"哦, 你打劫呀, 咁我報警囉!!" (油站姐姐氣定神閒地攞個電話出嚟打999)
"你真係冇有識死呀!!" (賊人氣敗而逃, 空手而回)

事後有記者訪問油站姐姐, 問佢點解一啲都唔驚仲一手推開賊人枝槍, 佢話一睇就覺得枝槍 "流流哋"!!

油站姐姐幸保不失, 好嘢!!

早幾日做咗一單 "企跳" case ("企圖跳樓" 是也), 報案人係一名大廈保安員, 亦即係我今日要表揚嘅主角!! 佢巡樓時見到一名男子, 一隻腳已經跨過走廊欄河準備跳樓, 形勢非常危急!! 保安員二話不說, 千鈞一髮之際及時將佢拉回安全位置!! 真係好險!!

經警方調查後, 原來依名男子係因為覺得好唔開心, 加上患有精神病, 至會做出如此傻事!!

一念之差, 佢可能未必會走上依條自殺嘅絕路..........

亦慶幸一瞬之間, 佢畀依名保安員從鬼門關拉返出嚟..........

何謂 "救人一命勝造七級浮屠"?! 依個故事正好體現咗出嚟嘞!!

尋晚返工都好多cases做呀!! 你哋明架啦, 週末真係高峰期嚟架~~因為個個都唔願咁早瞓囉!! 唔瞓覺做乜好?! 出嚟 "we we嘩嘩" 咁囉!!

咁咪變相多咗投訴噪音嘅cases囉!! 不過都好嘅, 依類案件大部分都好簡單又唔難做!!

之不過, 九個煲蓋又點可以一次過冚晒十個煲吖?! 人手有限但cases陸續有來, 更簡單嘅cases都冇辦法即時派到同事去處理啦!!

況且一隊人開工唔係一齊齋坐响度等cases到喎!! 仲要走去查牌, 擺路障, 同埋check好多指定地點架!! 唉~~佢哋都好辛苦吓!!

我尋晚拍嗰隊都算唔話得嘞!! 輪住嚟係咁做cases, 一單接一單都冇半句怨言, 又抵得諗, 真係群策群力呀!! 調返轉頭你哋嗌我幫手check嘢, 我都會落力啲醒神啲呀!!

師兄師姐們, 唔該晒!! 辛苦晒你哋啦!!

仲有感激你哋包容我將你哋巡邏車啲callsigns撈亂晒又亂咁嗌!!

小朋友係我哋將來嘅社會棟樑~~我細個嗰陣啲大人係咁同我講架!! 今時今日諗返起, 我就覺得自己似碌生蟲木多啲囉, 但又未至於係社會嘅寄生蟲!!

依家啲小朋友都唔知食乜奶粉大架, 搞到個個都咁鬼精靈, 又駁咀駁舌!! 雖然我未有耐有兒有女, 但我份工耐唔時都要同佢哋有啲對話架~~之唔係佢哋玩電話囉!! 不過今日我又唔係要鬧爆佢哋喎!! 反而係想表揚吓嗰啲真係報警嘅小朋友囉, 真係萬中無一呀!!

話說早幾日, 有個五歲半嘅男仔一打嚟999, 就講自己個地址 "XX樓1234", 如常地我都以為佢好似其他小朋友咁玩緊電話, 之但係又唔多似喎: 佢講個地址同來電顯示相同架~~好, 我即管睇吓你開邊瓣?! 我問佢打嚟做乜? 佢答我佢阿爺個頭跌咗落嚟~~吓?!

小朋友講嘢就係咁架啦, 表達能力梗冇我哋大人咁叻~~其實佢意思係話阿爺响張床度碌咗落嚟, 昏迷咗叫唔醒呀!!

消防control收完個call之後, 我再問埋小朋友個名同埋幾多歲.

嘩~~XXX小朋友, 你得五歲半咋!! 叻仔喎, 識得報警救爺爺, 抵鍚!!

依家故事發生喺數年前嘅一個中午時分, 我收咗個call, 係一名扑頭劫案嘅受害人打嚟, 佢响去緊銀行入數嘅途中, 個頭畀人用硬物從後扑穿咗, 六位數字嘅現金就咁畀人搶走咗.

警察到場無耐, 我又收到另一名報案人打嚟, 報稱見到兩名匪徒上咗架巴士剛剛响附近離開, 依位仁兄真係好堅呀, 佢自動自覺提供埋架巴士嘅車牌號碼, 幾多號路線同目的地呀!!

我收咗佢線之後都唔弱架, 見佢都唔似係報假案, 我電話都懶得打嘞, 直情親自快速地跑過去嗰個環頭個台度嗌機出去, 叫現場同僚留意依架巴士, 隔咗一陣已經截到架車仲拉埋人嘞~~據聞兩名匪徒當時响度分緊贓喎~~破案喇!!

事後依名報案人好似攞咗個好市民獎架, well done吖!! 我哋都叨光攞咗張compliment!!

好市民, 多謝你!!