文章分類: 鬧爆你 (Low Key Blog - 三醉清安)

你想點先??

lk818 — Sat, 23 May 2009 05:23:37 +0800

首先, 三醉清安要响度特別鳴謝某位同事嘅資料提供!! 話說有日, 有位女士打嚟999..........

依家就請各位估吓, 依位女士究竟報啲乜嘢不可思議嘅事件?! 提示: 當然係警察冇得做嘅嘢啦!! Also, 打去任何一個部門 (包括1823), 都係一樣冇得做嘅!!

哈哈, 相信任憑各位如何冰雪聰明, 都一定估佢唔到架嘞!! 嗱, 開估喇:

之唔係就係.......... 日光日白, 條街好多人喎!!!!!!!!!!

他媽的!! (Oh sorry, 請容許我今日一定要講句粗話!!) 喂~~阿大姑, 家陣全港九新界夾埋大大話話成七百幾八百萬人架, 條街點可能可以一個人都冇先?! 你以為自己去咗異域呀?! 如果有日你落到街, 反而一個人都冇, 咁一定又嚇死你啦?!?!?!?!?! 請問你報乜嘢警呀?! 你想警察點幫你先?! 幫你封咗條街佢呀?! 定係做疏散呀?! 要唔要做埋VIP escort沿途為你護航添吖?! What's wrong with u?!?!?!?!?!

投訴警察...

lk818 — Sat, 16 May 2009 05:16:41 +0800

999係處理緊急事件嘅..........

要投訴警察, 就唔該自己打去警察投訴課!! 咪鬼响度掗住條線, 阻住其他真正需要求助嘅人報警!!

警察投訴課
電話　　　　: 28667700
傳真　　　　: 22004460-62
地址　　　　: 香港灣仔軍器廠街3號警察總部堅偉樓附翼地下
網上投訴表格: https://secure1.info.gov.hk/police/epol-forms/Complaint
AgainstPolice_c.htm
服務承諾　　: http://www.police.gov.hk/hkp-home/chinese/perf/c_capo.pdf

警監會 (投訴警方獨立監察委員會)
網址　　　　: http://www.ipcc.gov.hk/tc/aboutus_01.htm

令人沮喪!!

lk818 — Wed, 13 May 2009 05:13:49 +0800

"警察999."
"XX商場個消防喉滴水呀!!" (對方係個唔越過十歲嘅小朋友)
"XX商場裏面嘅消防喉漏水呀?! 咁個商場有冇管理員架?! 不如你同管理員講啦!!"
".........."
"咁嗰個消防喉究竟係咪屬於XX商場嘅先?!"
".......... 媽咪 .........." (依然冇答我嘅問題, 但好明顯問緊後面嘅女人)
"喂, 喂!!"
"我畀我媽咪同你講吖?!"
"好吖, 咁你攞個電話畀你媽媽同我講啦!!"
"喂!!" (小朋友嘅媽媽接聽, 聽把聲似係二, 三十歲, 有讀足香港九年免費教育嘅!!)
"太太, 你個小朋友話有消防喉滴水喎. 請問個位置係咪屬於商場範圍架?! 抑或嗰個係公家街喉嚟?!"
"呢, 响XX街XX商場轉彎嗰度就見架喇!!" (咁即係街喉嚟啦!!)
"咦, 咁樣情況, 嗰個即係街喉嚟嗰囉喎!! 咁你可以直接打畀水務署揾職員嚟整返個街喉架!!"
"吓?! 我諗住要揾個消防員嚟熄返個水喉!!" (消防員唔係救火同拯救生命嘅咩?! 幾時做埋水電?!)
"哦, 唔係架!! 街喉係屬於水務署, 而唔係消防署架!! 你通知水務署得架嘞!!"
"點解要我通知呀?! 乜你依度唔係政府部門嚟嘅咩?!" (政府熱線係1823, 並非999呀!!)
"我依度係警察999, 係處理緊急嘢嘅!! 我諗要麻煩你自行揾返水務署嘞!!"
.......... (對話尾聲, 我提供咗水務署熱線電話28245000畀依位太太)

三醉清安後記:
1) 點解一開始唔係個大人打嚟999, 而係個小朋友自己打?!
2) 依位太太會唔會有可能大教壞細呢?! 999係緊急電話嚟架!!
3) 冇錯, 正常嚟講, 消防喉係消防員用得最多; 之不過全港嘅街喉都係歸水務署管轄架!!
4) 水務署作為其中一個政府部門, 到咗今時今日都仲未加入1823政府熱線!!
5) 我並冇觸犯到嗰個不知所謂嘅指令, 我只係請依位太太自己打去水務署, 而唔係1823!!

詳情請參閱水務署官方網址:
http://www.wsd.gov.hk/tc/contact_us/by_phone/customer_services_hotline/
index.html

無理取鬧!!

lk818 — Fri, 17 Apr 2009 04:17:47 +0800

原來三醉清安都好耐冇响個blog度鬧過人囉喎~~哈哈!! 不如今日就發吓癲鬧吓人先!! 如題, 今日嘅排頭係 "無理取鬧", 之不過無理取鬧嗰個就唔係我囉..........

有日, 有位師兄處理完一單 "Dispute" 之後電話報料~~因為單嘢係上更留落嚟, 所以我响收料嗰陣係唔多清楚個案情嘅!!

首先收咗啲人料 (所謂 "人料", 即係涉案人士嘅個人資料); 佢哋嘅關係: 司機同乘客!!

跟住係案情: 事發時間為朝早, 尊貴嘅乘客嫌個司機揸車揸得慢喎, 搞到佢遲大到咪响度鬧人囉!!

三醉: "係咪塞車呀?!"
師兄: "唔係呀, 係佢 (指乘客) 自己晏咗出門口咋!!"
三醉: "乜佢唔可以早啲起身出門口返工嘅咩?! 咁咪唔會遲到囉!!"
師兄: "我都有同佢討論過依個問題呀!!"
三醉: "咁架的士幾多號車牌呀?!"
師兄: "唔係的士係巴士嚟架, XX路線AB1234."
三醉: "唓~~乜唔係的士嚟架?! 咁就抵佢遲到啦, 咁趕仲走去搭巴士!! 依家仲怨人揸得慢?!"
師兄: "係囉!!"
三醉: "咁雙方和唔和解呀?!"
師兄: "個乘客唔settle呀!!"
三醉: "咁你有冇提議佢自行向巴士公司投訴呀?! 雖然依個不合理嘅投訴一定唔成立!!"
師兄: "咁就梗係有啦, 做咗嘞!!"
三醉: "咁就得嘞!! 如果唔係, 我驚佢一陣投訴埋你呀!!" (對話完畢)

瓜田李下!!

lk818 — Sat, 21 Mar 2009 03:21:21 +0800

其實有時有啲嘢就真係自己攞嚟衰, 惹人誤會係與人無尤架..........

話說曾經有單 "店舖盜竊" 嘅案件, 報案人係一位店員, 佢見到個男顧客响超市唔知攞咗啲乜嘢, 跟手放咗落T恤裏面喎!!

警察到場搜身當然無果啦~~因為嗰個男人原來啱啱响超市度聽完個電話, 雖然有電話繩綁住但都放心唔落, 所以隨即就將自己部手機擺入自己著緊嗰件衫裏面 "貼身保管" 囉!! 一場誤會啫!!

唉~~大佬, 知唔知乜嘢叫 "瓜田李下" 架?! 好心你就避忌下啦!!

港式英語...

lk818 — Sat, 14 Mar 2009 03:14:53 +0800

英語係國際語言, 但不同國籍人士所講嘅英語, 都會帶有不同嘅口音~~唔係誇張架, 有時一聽就大概知道係邊個國家架喇!!

但係依度明明係香港, 報案人明明係香港人, 唔知點解硬係要講英語囉~~仲要係一口港式英語口音, 又唔流利喎!! 乜咁樣好有型咩?! 香港都回歸咗十年啦, 依家仲係殖民地時代咩?! 好心你獻醜就不如藏拙, 講返廣東話罷啦!! 不過你要玩嘅話..........好吖, 我三醉清安假假地都讀足九年免費教育, 一於奉陪到底, 反正我又唔係唔識聽唔識講!!

若然我細個嗰陣有聽媽媽話畀多啲心機讀書, 學埋外國人嘅accent, 相信足以嚇得死依啲自以為是嘅小人, 到時佢哋就真係自己攞嚟囉!!

我畀人打!!

lk818 — Tue, 24 Feb 2009 02:24:45 +0800

都唔知啲人想點嘅, 不知所謂!!

有啲所謂嘅報案人, 一打嚟999就話畀人打, 跟住就廢噏一堆完全顯示唔到位置嘅舖頭名, 有啲就衰格到淨係掛住同後面嗰個係咁嘈 (but I'm still here, talk to me, please!!), 然後就收線架喇.......... 打返畀佢一係就相同情況, 一係就打唔通, 一係就留言.......... 頂!!!!!!!!!! 畀著係我都想打你呀!!

如果係用固網電話打嚟都仲好啲吖, 就算冇來電顯示地址, 我都仲可以追線揾你個位置, 只係慢啲啫!! 不過好邪嗰喎, 依啲咁討厭嘅情況多數都係用手提電話打嚟嗰喎!! 真係打死冇命賠, 事關唔知你响邊, 冇得做!!

真係有心報警嘅就唔該專心啲報完先啦!! 咪鬼我有我問, 你有你講先得架!! 你唔合作嘅, 我想幫都無能為力啦, 係咪?! 要人救你, 都先要自救!!

就好似今日咁, 有位女士用手提電話打嚟話畀人打, 佢答非所問, 係咁講一堆舖頭名出嚟就收線嘞!! 大姑, 首先我個電話唔係3G, 冇視像睇唔到你响邊!! 仲有, 你講嗰啲舖頭全部都唔出名架, 真係唔知响邊呀!!

冇辦法, 唯有打返佢個來電顯示嘞!! 接聽嘅係個男人, 佢話嗰個係佢老婆嚟嘅, 佢仲堅稱冇事添 (但明明個女人仲响後面呱呱嘈囉!!), 問多佢兩句就開始發難渣, 話自己都畀人打喎, 但死都唔肯講清楚個位置囉, 跟住收埋線唔再聽電話添!! 賤格!!

哼~~天網恢恢!! 有其他人見到佢哋糾纏喎, 幫佢哋報埋警, 位置仲講得好清晰添!! 最後兩個都拉咗~~"Fighting in a Public Place" (公眾地方打鬥), 因為雙方都有郁手!!

好狗攔路!!

lk818 — Sat, 14 Feb 2009 02:14:00 +0800

好狗唔攔路, 攔路就好 "狗"!!

唔知點解耐唔使就會有啲報案人打嚟999, 報稱响山邊/村落嘅必經之路遇到好兇悍嘅攔路野狗, 仲要係幾隻大狗添~~好驚喎, 唔知點做喎, 想揾警察過嚟幫手趕走啲狗咁囉 (但報案人都係有幾名同行者架吓!!)

報案嘅有女亦有男, 我收咗幾次類似嘅calls, 全部嘅報案人把聲聽落都係年輕/後生嘅!!

會唔會係家陣嘅新一代依賴性大咗, 唔係太識自行解決難題呢?! 定係佢哋遇到嘅難題真係好難呢?!

依兩個問題, 對我嚟講都係難題!!

畀著係我, 遇著攔路狗, 我會勇字當頭直行直過, 或者兜路行..........

不過冇辦法, 鬼叫警察有責任保護市民嘅生命安全咩!!

電話號碼...

lk818 — Sat, 07 Feb 2009 02:07:44 +0800

"警察999."
"喂, 唔該揾李美人吖!!"
"先生, 你打錯啦!!"
"吓?! 我打錯咗, 冇理由嗰喎!!"
"係呀, 你打咗嚟警察999報案中心呀, 請問你打幾多號電話架?!"
"吓?! 打咗999?! 冇理由架, 我打99965432嗰喎!!"
"係吖, 你講嗰個號碼, 打頭三個字已經駁咗嚟999啦!!"
"咁有冇99965432依個電話號碼架?!"
"你都試咗啦!! 咁你話有冇喇?! 先生, 如果你唔係報警的話, 我要收線架嘞!! 仲有, 真係冇99965432依個電話號碼架, 你唔駛再打喇!! 你嘅情況, 一係就人哋畀錯電話號碼你, 一係.......... (我想話 "人哋整蠱你" 但收返) 你自己搞清楚先啲啦!! 係咁先囉喎, 拜拜!!"

以上對話絕對為真人真事改編而成!!

好明顯係阿李美人小姐唔想畀佢個電話號碼畀依位先生啦, 但又唔識婉拒咯, 於是就作咗個咁嘅電話號碼出嚟囉!! 結果搞著我嘞!! 頂!!!!!!!!!!

不過算啦, 依位先生揾唔到佢要揾嘅人都已經夠慘lu!!

係咪機主?!

lk818 — Fri, 06 Feb 2009 02:06:41 +0800

"警察999."
"你好, 請問係咪945XXXXX嘅機主?!" (但接電話時我講明係 "警察999" 嗰喎?!)
"咦~~請問你打幾多號電話呀?!"
"我打945XXXXX囉!!"
"但係你打咗嚟999喎!!"
"吓?!"
"你打咗嚟999喇, 我依度係警察999報案中心嚟架!!"
"吓?! 哦~~對唔住!!" (收線, 對話完畢)

以上對話絕對為真人真事改編而成!! 三醉清安遇過唔止一次而係好多次!!

唔明!! 唔明!! 真係唔明!! 其實係致電者自己打錯號碼吖, 定還是機主飛咗條線落999呢?! 唔知道!!

我就親自攞出我個私伙手機, 試圖飛線落999, 但係操作失敗..........

財物發現...

lk818 — Tue, 20 Jan 2009 01:20:27 +0800

"警察999."
"我依家响XX警署對面嘅XX廣場外面, 不過我唔去差館架!!" (Then?! So?!)
"咦~~先生, 請問你打嚟999係乜嘢事架?!"
"冇~~我執到個銀包, 不過我唔會拎去差館架!!" (吓?! 之但係你一過咗條天橋就到警署囉喎!!)
"先生, 你都識講警署响你對面啦, 咁點解你唔攞埋個銀包直接去警署報案呀?! 你唔方便過去呀?!"
"係呀!! 我真係唔去差館架!! 你揾人嚟啦!!" (佢好強調~~佢一定唔入警署!!)
"唔~~你唔去警署報, 咁你會唔會留响度等警察先?!"
"你最好就揾警察過嚟接收個銀包啦!!"
"咁麻煩你唔好行開, 响度等我啲同事到啦!!"
"你哋快啲嚟喎, 我好趕時間嗰喎!!"
"哦, 好呀, 好快到架嘞, 你等一等啦!!" ..........

各位覺得依個call點樣?! 我表現得夠唔夠克制?! 依期我都冇乜嘢好講嘞!!

行使偽鈔...

lk818 — Wed, 07 Jan 2009 01:07:34 +0800

"行使偽鈔" 係刑事罪行!!

曾經收過一個999call, 報案人係個後生仔, 佢話收咗張懷疑偽鈔, 係啱啱搭完的士找返嚟嘅, 的士已經駛走咗, 而佢亦拒絕拎嗰張銀紙去就近警署報案. Anyway, 唯有叫佢响度等警察啦!!

警察未到場之前, 佢再打嚟, 咁啱又係我收返佢依個call喎~~你哋估吓佢今次打嚟做乜?!

催警察到場?! no 啦!!

佢話睇睇吓張銀紙好似係真嗰喎, 所以都唔再需要警察嘅任何協助嘞!! (吓~~咁點解你開頭唔睇清楚啲先呀?!) 我再三問佢係咪真係睇清楚?! 佢終於和盤托出嘞~~原來佢等警察等咗幾分鐘等得唔耐煩, 經已火速响就近便利店用咗張銀紙嚟買嘢lu, 咁個職員又照收囉喎~~咁張銀紙仲唔係堅嘢?!

哎吔, 後生仔, 究竟你有冇用吓個腦諗吓嘢架?!?!?!?!?!

1) 你報咗警响得度等警察嘅話, 你有乜理由走去 "毁滅證物" 架?!
2) 若然嗰張真係假銀紙, 你走去用咗佢, 咁即係輪到你行使偽鈔嗰囉喎?! "行使偽鈔" 係犯刑事架!! 任何人無需任何特訓就咁用常理諗都諗到依啲common sense啦~~今次你真係死好彩咋, 如果唔係..........你無端端就惹上官非嘞!!

最後, 警察冇耐都到咗場. 雖然揾唔到依個後生仔問話, 但就去過嗰間便利店調查, 證實冇收到假銀紙!!

識佢老鼠!!

lk818 — Sun, 04 Jan 2009 01:04:12 +0800

"警察999."
"我要報警呀!!"
"小姐, 請問你發生咩事要報警呢?!"
"有個人入咗我屋呀!!"
"嗰個係你邊個嚟架?!"
"我唔識佢嗰喎!!"
"你唔識佢?! 咁點解佢又入到你間屋嘅?? 其實你係咪畀人爆格呀?!"
"咁又唔係, 冇咁嚴重!!"
"吓?! 你開門畀佢入嚟架?! 你唔識佢, 咁你又會畀佢入屋嘅??"
"佢係我個仔個老豆嚟架!!"
"咁即係你老公啦!!"
"唔係呀, 我同佢簽咗紙離咗婚架嘞!! 我哋冇關係架!!"
"哦, 唔好意思, 咁即係你前夫啦!! 你前夫依家係咪响你屋企賴死唔走呀?!"
"係呀!!" ..........

以上對話絕對為真人真事改編而成!!

其實唔明點解啲報案人講嘢要咁隱晦, 乜嘢關係咪乜嘢關係囉!! 就算兩父子登報紙脫離關係, 佢哋永遠都仲係有血緣關係架啦!! 點解唔可以坦坦白白嘅啫?!

至於邊個收埋啲咁嘅call?! 好多架..........我識佢係老鼠!!

我都係其中一隻老鼠!! 我哋係同事關係!!

噪音投訴...

lk818 — Sat, 13 Dec 2008 12:13:10 +0800

返夜更坐999, 收嘅calls固之然有唔少都係噪音投訴嚟嘅, 尤其禮拜五六日晚!! 之不過有時日光日白都有投訴噪音嘅calls嗰喎!!

日光日白投訴啲乜?! 真係乜都有架~~投訴用擴音器叫賣啦, 投訴人哋打麻雀啦, 投訴人哋播音樂啦, 投訴人哋玩樂器啦..........依啲投訴都尚可接受, 而三醉清安覺得最難頂同埋最冇得做嘅投訴就係: (1) 投訴鄰近學校搞活動好嘈, & (2) 投訴人哋家居裝修好嘈!!

(1) 明知隔籬係學校就一定嘈架啦, 你都仲要住响度?! 況且學校一年有幾何搞活動啫?! 忍得就忍啦!!
(2) 哎吔~~人哋日光日白唔裝修唔通留返夜晚先嚟做咩?! (註: 係响閒日而唔係週末或公眾假期) By the way, 你冇交管理費咩?! 點解郁啲就要揾警察?!

我都唔知講乜好嘞..........

不如大家自己睇返環保署個官方網址嘅 "噪音管制條例" 啦:
http://www.epd.gov.hk/epd/tc_chi/environmentinhk/noise/guide_ref/noise_
guidelines.html

死醉貓吖!!

lk818 — Fri, 12 Dec 2008 12:12:48 +0800

飲醉酒嘅人真係好鬼死麻煩!!

三醉清安飲醉咗最多都係返到屋企一路不醒人事咁瞓覺啫!! 之但係有啲死醉貓就認真麻Q煩, 一醉咗就會以為全世界都想害佢, 想佢死, 我就真係唔乜得佢死嘞!!

尤其是禮拜五六日依啲高危日子呀, 高興得滯飲多兩杯啲死醉貓就嚟架啦!!

最衰就係醉唔晒, 打嚟999响度 "ke ke拮拮": 話人哋的士司機濫收車資啦, 話自己唔識路返屋企要警察嚟送佢返去啦, 一係就講舊事又話畀人迫害咁啦..........

要衰啲都仲有添: 明明係佢自己唔啱, 人哋對方報咗警, 警察處理緊佢都仲係要打嚟, 投訴現場同僚處事不當喎?! 都痴孖筋嘅..........

唉~~我諗我其實都係未醉醒!! 失禮晒!!