文章分類: 撞鬼你 (Low Key Blog - 三醉清安)

善意虛報...

lk818 — Tue, 18 Aug 2009 08:18:18 +0800

今日嘅標題係咪令你哋有啲疑惑呢?? 虛報咪虛報囉, 乜虛報都有分善意同惡意嘅咩?! 咁就梗係有啦, 唔係我三醉清安又點會攞出嚟講吖, 係咪先?!

响未解釋 "善意" 同 "惡意" 之前, 首先就講吓乜嘢係 "虛報"~~顧名思義, 就係事實上根本冇件咁嘅事情發生過, 但偏偏又唔知點解會畀人講到似層層, 好似真有其事咁樣!!

照字面解, "惡意虛報" 都好簡單易明啫, 之唔係不懷好意地虛報事件囉, 咁簡單就無需多講嘞!! (請注意: 虛報及浪費警力屬刑事罪行, 切勿以身試法!!!!!!!!!!)

至於 "善意虛報" 呢.......... 咪就係不懷惡意嘅虛報囉!! For example: 見到有班人互相追逐, 好似打緊交咁款 (實情係玩緊); 見到有人企响天台邊/行人天橋頂, 好似準備跳樓自殺 (實情係响度抖吓氣/貪玩); 見到有人响海面載浮載沉, 好似遇溺喎 (實情係玩緊浮潛).......... "善意虛報" 嘅例子實在太多喇, 恕未能一一盡錄!!

講完一大輪, 究竟你哋又理唔理解到, 乜嘢係 "善意虛報" 呢?!

最簡單嘅解法, "善意虛報" 咪就係一場誤會囉!!!!!!!!!! See??

少數族裔...

lk818 — Sat, 13 Jun 2009 06:13:49 +0800

語言, 係人與人之間用以互相溝通嘅工具; 唔同嘅國家又有自己嘅語言喎, 咁不同國籍嘅人又點樣溝通先?! 一係就你講我嘅語言囉, 一係就調返轉我講你嘅語言嘞, 否則就收線冇計傾!! 但係好在依個世界有英文作為國際語言啫, 响你唔識我嘅語言而我又唔識你嘅語言嗰陣, 就一齊講英文啦!!

响香港, 普遍流通嘅語言有廣東話, 普通話同埋英文. 不過大家唔好忘記, 香港地仲有一群非華籍族裔人士, 佢哋未必識聽識講我哋嘅語言, 有啲甚至連英文都唔係好識嘅添!!

今年3月, 响何文田發生咗一單警員開槍案, 詳情請參閱以下 "頭條日報" 嘅專題新聞:
http://www.hkheadline.com/news_topic/index.asp?id=88

自從依單嘢之後, 多咗人關心少數族裔人士响香港嘅生活. 其實警務處都有做嘢架, 近日九龍總區指揮及控制中心就聯同 "基督教勵行會" 合作, 為一群致電999報案嘅少數族裔人士提供翻譯協助..........

以下原文引用自香港警務處第895期 "警聲雙週刊" (刊登日期: 2009/05/27-2009/06/09):
http://www.police.gov.hk/offbeat/895/chi/

「九九九」緊急求助熱線中心
為非華裔社群提供服務

　　最近，西九龍總區指揮及控制中心與政府資助機構「基督教勵行會」攜手合作，為致電「九九九」電台求助但不懂廣東話、普通話或英語的非華裔市民提供協助。雖然非華裔人士的來電不多，但照顧他們的需要亦十分重要。現時，若電台的接線員遇到語言上的問題，該會的非華裔職員可透過電話會議方式，協助警方迅速確定來電者的所在及發生的事情。

　　西九龍總區警司（行動）區達善表示：「我們『九九九』電台的接線員經驗豐富、有耐性而且富技巧，來電者若在溝通上有問題亦可提供一定程度的協助。然而，與基督教勵行會合作後，便能克服更大的困難。基督教勵行會一直為非華裔社群提供翻譯及諮詢服務，由他們與警方合作，最合適不過。」

　　區達善舉出一個數年前發生的例子，一名剛到地盤上班的尼泊爾籍看更，在地盤遭人綑綁行劫。雖然他最終用手提電話致電「九九九」，卻未能向總區指揮及控制中心的接線員說出他的位置及發生了甚麼事。處理事件的人員得花上一段時間才找到他。

　　十多名「基督教勵行會」成員五月中獲邀訪問西九龍總區指揮及控制中心，並由主管白義理、總警察通訊員陳錦綸及高級警察通訊員麥敏儀帶領他們參觀，以增加認識控制中心的運作及「九九九」來電的處理方式。他們當中有懂得南亞地區語言，包括烏爾都語、尼泊爾語、旁遮普語及印地語。

　　麥敏儀提到自己二十年的警隊生涯中已駐守過每一個總區的電台。她看到非華裔人士來電者的數目在過去四、五年間不斷增加，亦知道警隊有需要為他們提供協助。

　　她指出：「非華裔人士並非每一次致電電台都是為了緊急事故。『九九九』電台偶爾會接到一些來自南亞的非華裔旅客來電，他們在一個陌生的城市因遺失護照或其他重要旅行證件而不知所措，故致電求助。」

　　參觀結束後，「基督教勵行會」經理潘永樂表示，希望將來可安排更多訪問和參觀。他說：「這是一個互動過程。在可能情況下，當警方遇到困難時，我們能夠提供協助。此外，隨著我們對警務工作有更深的認識，及與警方建立更緊密的聯繫，使我們增強了信心，更能清楚地告知非華裔服務對象，如何充分使用警察服務。」

　　潘永樂續說：「雖然目前言之尚早，但我希望將來能帶給非華裔社群更大信心，當他們遇到困難時，會主動向警方尋求協助，而他們亦無須因語言障礙而怯於求助。」

　　尼泊爾籍的Sarala Gurung和巴基斯坦籍的Neelam Mumtaz女士對於首次參觀電台印象深刻。她們會將參觀的所見所聞，包括「九九九」系統的運作及電台接線員的專業精神，一一告訴朋友和同事。

　　「基督教勵行會」熱心社會事務，合作令警隊的服務得到改善，亦毋須額外開支。該會希望進一步提升他們的功能，協助警方服務市民。

服務承諾...

lk818 — Sat, 06 Jun 2009 06:06:59 +0800

轉眼間, 我三醉清安已經有兩個禮拜冇响依個Low Key Blog度發表過 "偉論" 嘞!! 今日發乜噏風好呢?! 不如講吓服務承諾啦!!

翻開警隊官方網頁嘅 "服務承諾" 一欄睇睇.......... 嘩, 原來警隊對市民嘅服務承諾都有好多款架: 有行動部 (999緊急熱線), 牌照課, 交通總部, 刑事部, 同埋投訴警察課五大項!! 畀我揀嚟講, 咁就梗係揀我最熟識, 最成日接觸嗰個範疇啦~~之唔係行動部囉!!

1) 服務範圍: 服務承諾涵蓋接聽999電話, 及回應999緊急求助電話.
2) 服務標準: 力求於9秒內接聽每個999來電, 及於既定時限內回應所有真正嘅999緊急求助電話 (港島及九龍總區嘅平均回應時間為9分鐘, 新界總區為15分鐘~~由接call起計, 至警員到場).
3) 有效監察: 對上述服務標準進行內部監察.
4) 服務目標: 全日24小時全天候為999來電者提供迅速及有效率嘅服務.
5) 公眾人士角色: 若然未能於既定回應時限內處理案件, 如需警方解釋, 可與該區警民關係主任或警察熱線25277177聯絡.
6) 申訴權利: 如個案未能得到妥善處理, 可親身前往任何一間警署或警察投訴課, 或致電投訴課熱線28667700, 或寄信至投訴課, 或填妥警察網頁內嘅電子投訴表格發送.

參考資料來自以下官方網址:
http://www.police.gov.hk/hkp-home/chinese/perf/c_operation.pdf

警隊服務承諾:
http://www.police.gov.hk/hkp-home/chinese/perf/cindex.htm

禽鳥屍體...

lk818 — Tue, 19 May 2009 05:19:59 +0800

自從禽流感一役, 以後所有鳥類屍體都要由漁護署職員撿走..........

其實死雀又唔係死人, 根本唔係啲乜嘢緊急嘢, 都唔明點解硬係會有市民打嚟999報警 (當中有大人有細路), 都唔知佢哋報嚟做乜?! 條屍引起群眾恐慌就話啫!! 唉~~自己打1823通知漁護署咪得囉!! 漁護署收到報告之後都會好快到場處理架!! (三醉清安本人都見識過人哋嘅效率!!)

仲有, 多得嗰個垃圾指令, 我哋又唔做得提示/教導市民可以自行打1823 (下刪千萬字)..........

處理野生禽鳥屍體安全指引:
http://www.afcd.gov.hk/tc_chi/whatsnew/what_qua/files/handling_of_
dead_birds.pdf

漁農自然護理署官方網址:
http://www.afcd.gov.hk/cindex.html

香港地震?!

lk818 — Tue, 12 May 2009 05:12:53 +0800

今日係2009年5月12號, 四川八級大地震轉眼間已經過咗一年喇!!

記得每當鄰近地區發生地震而响香港都感覺到嘅時候 (依種叫 "有感地震"), 都會有好多市民打嚟999報警嘅, 我三醉清安有份收唔少囉!! 佢哋嘅問題不外乎:
1) 係咪地震呀?!
2) 應該點做?!

其實全世界大部分強烈地震, 都係發生响地殼板塊嘅邊緣架!! 香港就位於歐亞板塊裏面, 而並非板塊邊緣, 更加遠離環太平洋地震帶 (位於歐亞板塊與太平洋板塊邊界之間, 並貫穿日本, 台灣同埋菲律賓), 所以香港發生大地震嘅機會係甚微嘅!!

若然遇上地震, 應該點做呢?!
1) 保持冷靜
2) 熄滅火種
3) 响室內的話就繼續留响室內, 揾個安全位置如堅固嘅傢俬下面, 遠離容易墮下嘅物件
4) 响戶外的話就要走到空曠地方, 盡量遠離建築物, 斜坡, 架空電線等
5) 响升降機/隧道裏面就要盡快離開
6) 揸緊車就要响安全情況下停低

地震停止之後, 又應該點做呢?!
1) 檢查有冇傷亡同損毁情況
2) 檢查有冇氣體燃料洩漏 (有就開窗熄總掣離開現場, 千祈咪响現場點火打電話!!)
3) 如果水電設施受損, 都係熄總掣
4) 唔好亂打電話, 以免線路繁忙, 阻礙他人求救
5) 如果建築物嚴重受損有可能倒冧, 應盡快離開

不過, 由於香港發生大地震嘅機會甚微, 所以我會建議來電市民留响安全位置, 有需要可以走到空曠地方, 盡量留意新聞報導.......... 真係唔駛恐慌架, 因為你哋遇到嘅只係有感地震!!

參考資料來自香港天文台官方網址:
http://www.weather.gov.hk/education/edu02rga/edu02_earthquake_c.htm

樹木倒塌...

lk818 — Sat, 09 May 2009 05:09:16 +0800

平日冇事冇幹, 全港九新界所有嘅樹木都係唔會同警察扯上任何關係嘅!! 之但係, 若然有樹木倒塌, 就一定會有市民報警囉!!

"Fallen Tree" 依個排頭, 對三醉清安嚟講, 有時的而且確係頗為惱人!! 因為唔同地方嘅樹木, 係由不同嘅政府部門管轄架!! 有時要揾返有關部門去認頭處理, 都有一定嘅難度囉!! (如果情況危急或者有即時危險, 就唯有即刻call埋消防過嚟幫咗手先嘞!!)

以下係8大負責管理樹木嘅政府部門, 同佢哋嘅管轄範圍概述:
1) 漁農自然護理署 (管理範圍: 郊野公園)
2) 康樂及文化事務署 (管理範圍: 轄下場地及公眾道路旁)
3) 房屋署 (管理範圍: 公共屋邨)
4) 路政署 (管理範圍: 轄下斜坡及高速公路)
5) 渠務署 (管理範圍: 渠務設施範圍內)
6) 地政總署 (管理範圍: 政府土地)
7) 水務署 (管理範圍: 水務設施範圍內)
8) 建築署 (管理範圍: 轄下斜坡)

參考資料來自蘋果日報:
http://hk.apple.nextmedia.com/template/apple/art_main.php?iss_id=20090401&sec_id=4104&art_id=12589196

一八二三...

lk818 — Sat, 02 May 2009 05:02:58 +0800

唔知各位知唔知道, 香港政府設有一個電話熱線, 叫 "1823政府熱線", 電話號碼係1823呢?! 其實1823都好幫到手架!! At least, 一啲非緊急嘅事件, 市民可以打畀佢哋等轉介囉!! (由於時間關係, 例子留返下回再講!!)

依個熱線嘅電話中心係由香港特別行政區政府效率促進組管理嘅; 响2001年成立, 並於2002年10月全面投入服務; 每日廿四小時, 年中無休咁為各位市民服務; 佢嘅職責如下:

1) 作為一個綜合聯絡處, 為20個有份參與嘅政府部門解答市民嘅查詢, 同埋接收投訴;
2) 提供其他政府部門嘅聯絡資料;
3) 轉介投訴個案畀適當嘅部門 (跨部門亦可);
4) 回應市民嘅投訴

而有份參與依個熱線嘅政府部門包括:
　漁農自然護理署　　　建築署　　　屋宇署
　土木工程拓展署　　　公司註冊處　　　渠務署
　機電工程署　　　食物環境衛生署　　　香港郵政
　路政署　　　康樂及文化事務署　　　勞工處
　土地註冊處　　　海事處　　　政府資訊科技總監辦公室
差餉物業估價署　　　學生資助辦事處　　　社會福利署
　衛生署控煙辦公室　　　運輸署

參考資料及圖片來自以下1823官方網址:
http://www.1823.gov.hk/big5/home.htm

以下係1823政府熱線助理客戶服務主管馬愛詠小姐嘅訪問:
http://www.youth.gov.hk/tc/kaleidoscope/1823_officer_tc.htm

警鐘誤鳴...

lk818 — Tue, 28 Apr 2009 04:28:43 +0800

警鐘, 大致分兩種: 一種叫 "消防警鐘", 另一種叫 "防盜警鐘".

通常, 消防警鐘會駁咗去消防處, 而防盜警鐘就駁咗去警鐘公司. 如果有警鐘響, 消防處/警鐘公司會通知警方 (前者為無需警察到場處理嘅案件, except真係有火警發生, 或者有其他特別嘢!!) 其實, 我哋都好少收到市民報警鐘響架!!

前陣子嘅某通宵, 坐999; 是夜, 不同時分不同地區都有市民報警, 話有警鐘響喎!! 基於唔係人人 (包括我) 都識得分別出消防警鐘同防盜警鐘, 於是乎, 係咪都揾埋警察到場囉!! 唔係點啫?!

結果?! 十個有九個半都係消防警鐘嚟囉!! 不過全部都係誤鳴, 而誤鳴嘅原因係天氣潮濕!!

家居意外...

lk818 — Tue, 14 Apr 2009 04:14:29 +0800

小朋友真係冇有識死呀!! 火水啲味咁怪, 都可以照樣攞嚟飲落肚嘅?!

做家長嘅都唔啱啦!! 首先, 有乜理由用個飲品膠樽嚟裝依啲危險物品嘅啫?! 用咗都算嘞, 收好佢吖嘛!! 真係唔好隨處放呀, 家陣出事嘞!! 其實依啲家居意外係可以避免架!!

三醉清安在此謹祝小朋友早日康復!! 以後唔好再咁曳喇!!

誤飲火水男童情況嚴重

(星島) 4月13日星期一 22:17

誤飲火水的二十個月大男童，在將軍澳醫院急救後，被轉往聯合醫院兒童深切治療病房留醫，現時情況嚴重。

事發在下午一時許，男童與三歲兄長在軍澳景林邨家中玩耍時，男童誤飲火水，期後身體抽蓄及嘔吐，母親發現報警。

（即時新聞）

海面浮屍??

lk818 — Mon, 30 Mar 2009 03:30:04 +0800

各位唔駛驚, 今日要講嘅嘢絕無驚嚇成份, 只係得啖笑嘅啫!! 真嘅浮屍又有乜好講吖?!

心水清嘅朋友都知道三醉清安唔係守水警電台架嘞!! 你哋可能會問: 乜海面嘅嘢唔係歸水警嘅咩?! 咁又何來 "浮屍" 畀我講先?! 好邪吓喎, 呵?!

須知道成個香港都係畀個海圍住, 若然有件疑似浮屍物體挨近海皮, 又點會冇市民報警先?! 打999咪又係搭咗過嚟land依邊嘅總區指揮及控制中心 (跟住我哋再refer返去Marine); 如有需要, 我哋都會揾埋陸地嘅manpower去睇!!

類似嘅浮屍案件都有幾單架喇, 成件人形嘅又有, 疑似殘肢嘅都有. 但其實又邊得嚟咁多浮屍吖?! 撈起又咪係不外乎海面垃圾~~係喎, display公仔游海水喎!!

不過近年都少咗依啲一場誤會嘅情況lu (唔知係咪海事處做多咗嘢?!) 依家多數嘅浮屍案件都係堅嗰喎!!

三號幹線?!

lk818 — Fri, 27 Mar 2009 03:27:07 +0800

上回已經詳細列出各主要幹線所包括嘅公路嘞!! 唔知你哋有冇留意到, 當中有四條幹線都係橫跨港九新界嘅呢?!

不如你哋又估下, 响公路上最常有啲乜嘢case發生?!

之唔係又離唔開交通意外, 壞車, 雜物阻路, 行人行公路咁囉!!

有時啲市民打嚟999報警, 佢哋嘅熱心就夠晒架喇, 只可惜唔係個個都提供到個正確路名囉!! 講得出附近有咩建築物或者大概近邊度都還好啲吖, 起碼我哋都仲可以憑依啲資料, 從而推斷出有關公路!!

最老套就嗰啲乜都講唔到, 淨係講到幾號幹線嘅朋友囉!! 唔知點解我成日都會收到嗰喎~~"吓, 我淨係知道行緊三號幹線咋!!" 嘩~~真係唔該晒呀, 三號幹線好長吓囉:

干諾道西 >> 西區海底隧道 >> 西九龍公路 >> 青葵公路 >> 青衣西北交匯處 >> 汀九橋 >> 青朗公路 >> 大欖隧道 >> 青朗公路 (連接9號幹線)

港九新界都有份呀, 咁個I/N開去邊個警區先?!

所以我哋都會盡量問多啲引導性問題, 通常都成功架!!

不過自從路政署安咗啲里程標誌响路邊之後, 依個難題簡單咗好多喇~~麻煩位報案人讀個編號畀我哋聽, 咁咪可以用電腦check到個位置囉!!

道路幹線...

lk818 — Thu, 26 Mar 2009 03:26:38 +0800

三醉清安上回同你哋講過公路上嘅里程標誌, 今回就介紹埋香港嘅道路幹線!!

1號幹線:
香港仔海傍道 >> 黃竹坑道 >> 香港仔隧道 >> 堅拿道天橋 >>
紅磡海底隧道 >> 康莊道 >> 太子道 >> 窩打老道 >>
獅子山隧道 >> 獅子山隧道路 >> 沙田路 (連接9號幹線)

2號幹線:
東區走廊 >> 東區海底隧道 >> 東區海底隧道路 >> 觀塘繞道 >>
大老山隧道 >> 大老山公路 (連接9號幹線)

3號幹線:
(連接4號幹線) 干諾道西 >> 西區海底隧道 >> 西九龍公路 >>
青葵公路 >> 青衣西北交匯處 >> 汀九橋 >> 青朗公路 >>
大欖隧道 >> 青朗公路 (連接9號幹線)

4號幹線:
柴灣道 >> 東區走廊 >> 告士打道 >> 夏愨道 >>
干諾道中 >> 干諾道西 (連接3號幹線)

5號幹線:
(連接7號幹線) 觀塘道 >> 啟福道天橋 >> 啟福道 >>
啟德隧道 >> 東九龍走廊 >> 漆咸道北 >> 加士居道 >>
渡船街 >> 西九龍走廊西 >> 塘尾道 >> 西九龍走廊 >>
荔枝角道 >> 葵涌道 >> 荃灣路 (連接9號幹線)

6號幹線: (預留畀將來主要幹線)

7號幹線:
環保道 >> 將軍澳道 >> 將軍澳隧道 >> 將軍澳道 >>
觀塘道 >> 龍祥道 >> 呈祥道 (連接5號幹線)

8號幹線:
北大嶼山公路 >> 青嶼幹線 >> 汲水門大橋 >> 青馬大橋 >>
青衣西北交匯處 >> 長青公路 >> 青沙公路 >> 尖山隧道 >>
沙田嶺隧道 >> 青沙公路 (連接9號幹線)

9號幹線:
象鼻山路 >> 城門隧道 >> 城門隧道路 >> 大埔道-沙田段 >>
吐露港公路 >> 粉嶺公路 >> 新田公路 >> 青朗公路 >>
元朗公路 >> 屯門公路

10號幹線:
深港西部通道 >> 港深西部公路 (連接9號幹線)

如有需要, 請自行參閱運輸署嘅香港主要幹線簡圖:
http://www.td.gov.hk/mini_site/hksrens/2008/TC/RouteMapM.htm

入屋爆竊...

lk818 — Sun, 15 Mar 2009 03:15:15 +0800

以下故事係好多好多年前, 一位老差骨講我聽嘅, 係真係假無從稽考..........

話說依位老差骨奉召調查一單爆竊案, 到場後發覺案發現場非常整齊~~冇錯係整齊而唔係混亂!! 除咗個門鎖撬爛咗之外, 根本都唔似畀人爆過格!!

原來係個住戶覺得間屋畀匪徒摷到亂晒, 畀外人 (包括警察) 見到好似唔多好, 於是响報警之前佢就執返好晒啲嘢先囉!!

哎吔~~如果匪徒留咗指模同證據响現場都通通畀佢毁滅晒囉!!

里程標誌...

lk818 — Mon, 09 Mar 2009 03:09:32 +0800

"里程標誌" 係啲乜?! 請各位睇吓以下圖片先:

係咪似曾相識呢?! 冇錯, 佢就係你哋响公路一定會見到嘅 "里程標誌" 嘞!! 未見過?! 冇理由!! 人哋係一對對咁黐咗响公路兩邊, 你左眼見唔到右眼都會見到嘅, 未見過就一定係你搭車瞌眼瞓冇為意啦!!

依個牌仔究竟想點?! 咪就係想話畀你知, 你嘅所在地囉!!

1) 黃底黑字嗰個係路盾, 上面嘅數字係表示所在公路係屬於邊條幹線 (如圖示: 三號幹線)
2) 路盾一左一右嘅中英文字係表示所在公路嘅方向 (如圖示: 北行線/North Bound)
3) 企响路盾上面嘅白色數字係代表你响條幹線嘅邊個位置, 係幹線嘅里程距離~~要知道一條幹線係幾咁長先得架, 又橫跨多區喎, 分分鐘仲貫穿埋港九新界添呀!! 而不論你身處公路邊個方向, 同你平排嗰四隻里程標誌 (計埋對頭方向嗰兩隻) 上面嘅數字都一定係相同架!! 當你向前再行, 個數字就會越嚟越大或者越嚟越細 (依個要視乎你係向邊個方向行嘞!!) 過兩支燈柱就會進/退0.1 (如圖示: 下一個就會係23.6或者23.8, 都係要睇你係南行定北行)

三醉清安下次再同你哋講幹線!!

參考資料及圖片來自運輸署:
http://www.td.gov.hk/transport_in_hong_kong/hk_strategic_route_and_exit_
number_system/index_tc.htm

命喪公路...

lk818 — Sun, 08 Mar 2009 03:08:28 +0800

唉~~依頭先至講完醉酒累事, 嗰頭又出事嘞!!

尋晚有人目擊一名醉酒人士非常危險地响公路行走, 可惜警察到場嗰陣已經見佢受傷倒地, 而佢嘅傷勢就明顯地係交通意外所導致嘅, 冇耐救護員都即場宣佈佢死亡!!

無奈!!

屯門公路男子疑被車撞斃

(明報)3月7日星期六 10:05

一名男子凌晨被發現倒斃在屯門公路，警方懷疑他被的士撞倒，要求一名的士司機，協助調查。

在凌晨約1時多，有人報案稱，在屯門公路入新界方向近小欖，有1名醉酒男子流連。

警方亦接獲一名的士司機報案稱，懷疑沿屯門公路駕駛一輛的士時輾過一名男子。該輛的士返回現場。司機現正協助警方調查。

救護員到場發現該名22男子，證實他已死亡，死者年約22歲。警方呼籲市民如目擊該宗交通意外，可致電36611300或36611346與調查人員聯絡。

（即時新聞）